16 Jul, 2020

Ресторан во кој имаш чувство како да си на светски настан

Дистрикт Бар и Ресторан

Ресторан во кој имаш чувство како да си на светски настан

Во секоја метропола има места кои се беспрекорни во секој поглед, нудат одлични оброци подготвени со љубов од светски познати шефови, атмосфера која ти буди позитивна енергија и чувство дека местото работи само за тебе и сите тебе ти се наклонети и место на кое ќе имаш моменти за паметење. Едно такво место, лоцирано на самиот плоштад Македонија, во строгиот центар на Скопје, кое е во склоп на престижниот хотел „Мериот“, е „Дистрикт бар и ресторан“, каде што ќе се почувствувате навистина светски со феноменален амбиент, кој ќе ве одведе во некоја друга димензија... Секоја ситница, секој детаљ, секој агол, сè во него е избрано со вкус и со особено внимание и одлично се надополнува и го прави овој ресторан препознатлив и исклучителен по многу нешта. Можноста за трансформација од денска кафетерија во бар со екстра коктели со експлозивни вкусови, па до ресторан со специјалитети со македонско, медитеранско и источноевропско влијание, приготвени од рацете на врвни кулинари, прави и вие за миг да помислите дека сте дел од некој светски настан со славни личности. Персоналот во секое време е расположен и подготвен да ви излезе во пресрет на сите ваши барања и желби и да се почувстувате во центарот на вниманието. 

Така, и менито е нешто од кое ви запира здивот, богата понуда, специјалитети што само овде може да ги вкусите и долго да се сеќавате на нив. Нашето кулинарско патување овој пат ни почна со вагу говедско карпачо со капери-семе од синап и масло од тартуф. Овој одличен спој на вкусови уште на првиот залак ви дава непроценливо чувство на богата текстура, од која ви навира дополнително количество плунка и желба за посегнете по уште.

По вакво карпачо, се запрашавме дали е потребно да нарачуваме воопшто нешто друго!? Сакавме тој вкус да го зачуваме во устата малку подолго. Но, љубезниот шеф на кујната ни препорача еден карактеристичен специјалитет како предјадење - туна тартар со васаби мајонез и крцкави црни алги. Самото име ветуваше многу и не се излажавме. Од начинот на кој беа сервирани, до самиот изглед, па сè до вкусот - неверојатно добро приготвени и со уште поневеројатен вкус. Само треба да се проба, навистина. Појдете, нарачајте го со чаша бело сортно македонско вино и нема за зажалите, чувството е возвишено.

Печурки има во речиси сите ресторани, и тоа приготвени на разни начини, но ова што овде го вкусивме - е тоа е нешто посебно и го има само тука. Приготвени на 3 начини – пржен вргаџ, пена од вргаџ и вргаџ во прав. На прв поглед ќе помислите дека не сте се разбрале добро, ви носат некој десерт! Вкус, декорација, подготовка - чиста 10. Иста печурка, но секоја од подготовките дава посебен вкус и го надополнува претходниот. Перфектна комбинација која ни најпребирливите нема да ги остави рамнодушни.

Стасавме и до главното јадење и веќе не ни помислувавме дека нема да биде совршено. Уште посмела комбинација, играње со спротивставени продукти и вкусови, а сепак одлично вклопени, мислиш создадени еден за друг. Неговото величество – свинско филе со карамел сос и џигер од патка. Не, нема потреба да го доловуваме вкусот, нема да биде оригинално онака како што всушност ние го доживеавме и не може да биде. Ова е единствен вкус, мора да се проба!

Наздравиме со сортно македонско вино и останавме уште долго да уживаме во спојот на добрата храна, величествениот амбиент, дискретниот персонал, тивката музика што одеше во заднина и релаксираниот муабет на кој му немаше крај.

Наша приказна, наше место, наш град... а како од бајките.